بغداد / سكاي برس
اكثر من 3 اشهر والبلد تايه وضايع بين حانة ومانة .. وبين هذا الحزب وذاك وبين تصريحات هذا السياسي وتصريحات غيره .. والوضع متأزم الى اعلى مستوى من العنف والفوضى .
فوك ما البلد هذا وضعه وخربانة اموره واحواله .. تجينا صدمة ثانية جديدة وحتى بعدها بالباكيت وهي عطلة مجلس النواب العراقي الي راح تبدي من باجر وتستمر لاكثر من شهر ونصف .. ونرجع وانكول ياريت لو باقين على تجاهل الحكومة فقط .. حاليا نشهد تجاهل اكبر من قبل البرلمان الي هو ممثل عن السلطة الشعبية بهاي الدولة الرشيدة .. هذا التعطيل كانما ولا كل شيء ما صاير .. وكانما الامور حلوة ووردية والبلد اوضاعه عال العال .
والشعب هذا خطية لان يريد من النواب الي هما عايشين حياتهم ويسافرون لهذا البلد وذاك البلد سواء بهاي عطلتهم او غيره ، حتى بايام الدوام والالتزام هم غايبين عن الجلسات والدليل الجلسة الاخيرة الي انتهى حالها الى جلسة تداولية وتشاورية لان حتى رئيس البرلمان ما حضرها ، كل هذا الاهمال والاستهانة نريد منهم يتركون عطلتهم ويحلونا وضع بلدنا هذا الميؤوس منه ..
لذا لازم النائب يروح ويرفه عن نفسه ويصول ويجول ببلدان العالم لان بالايام السابقة حقق ونفذ هواية امور وصوت على هواية قوانين خدمتنا وخدمت هذا البلد .. لذا لازم يسافر حتى يرجعنا عقله فريش ويحاول يطور هذا البلد ليصطف الى جانب الدول المتطورة ..
ولو هذا الوضع نشوفه في بلد اخر يحترم مكانته ويحترم مواطنيه ويقدر شعبه كان محد سكت و تهاون واستخف بهذا الوضع ولم تغمض لا عين ولا جفن لهذه الحكومات حتى يستقر ويصلح حال البلد .. ومثال على هذا الامر هو حادثة سقوط الطائرة الاوكرانية الي هناك دول عدها ضحايا فيها معدودين على اصابع اليد الا انهم غضبوا واخذوا بحق هذه الارواح المعدودة تعويضا ماليا وعقابيا من الذي كان السبب !!!
لكن السياسيين العراقيين غير ذلك مهتمين فقط بمصحالهم الشخصية ومصالح اتباعهم !!
في نهاية الامر نطلب من العلي القدير ان يرأف بحالنا ويرحم بنا ..
